Naghatid ng iba’t ibang serbisyo, learning sessions, at volunteer activities ang HAPIsABELA Youth Volunteers: A Day of Service 2026 sa 197 mag-aaral ng Westside Elementary School noong Agosto 20, bilang bahagi ng patuloy na pagsusulong ng youth volunteerism at community service sa Lungsod ng Isabela.
Isinagawa ang aktibidad ng Pamahalaang Lungsod ng Isabela, sa ilalim ng pamumuno ni Punong Lungsod Sitti Djalia Turabin-Hataman, sa pamamagitan ng Lokal na Tanggapan ng Pag-unlad ng Kabataan (LYDO) at pinondohan sa ilalim ng Gender and Development (GAD) Program.
Layunin ng taunang youth volunteerism initiative na itaguyod ang makabuluhang pakikilahok ng kabataan habang inilalapit sa mga komunidad ang mahahalagang serbisyo, adbokasiya, at suporta.
Binigyang-diin ni CIO at GAD Focal Person Mendry-Ann Lim ang kahalagahan ng GAD sa paglikha ng ligtas at inklusibong espasyo para sa mga bata. Tinalakay niya ang paggalang, pagkakapantay-pantay, dignidad, kabutihan, at pagtanggap sa pagkakaiba-iba bilang mahahalagang pagpapahalaga sa pagbuo ng ligtas at inklusibong kapaligiran para sa bawat bata.
Kasabay nito, isinagawa ang HAPPY and SAFE School Sessions na nakatuon sa bullying prevention at school safety. Sa pamamagitan ng mga talakayan at age-appropriate na aktibidad, tinulungan ang mga mag-aaral na maunawaan kung ano ang bullying, ang epekto nito sa iba, at ang kanilang papel sa pagbuo ng masaya, ligtas, at magalang na paaralan. Itinuro rin sa kanila kung paano humingi ng tulong sa isang pinagkakatiwalaang nakatatanda.
Bukod sa learning sessions, naghatid din ang programa ng mga serbisyong direktang mapapakinabangan ng mga mag-aaral at kanilang pamilya.
Nagkaloob ang Tanggapan ng Rehistro Sibil ng libreng pagrerehistro para sa mga batang walang birth certificate at kanilang mga magulang o guardian. Kabilang dito ang assessment ng civil registration concerns, orientation tungkol sa birth registration at delayed registration, at gabay sa mga kinakailangang dokumento.
Samantala, nagbigay naman ang 19th Special Forces “Magnitude” Company ng libreng gupit bilang bahagi ng pagsusulong ng personal hygiene at self-care ng mga mag-aaral. Isinagawa rin ang pormal na turnover ng mga nalikom mula sa Singlab Fun Run 2026, kung saan ipinagkaloob sa Westside Elementary School ang dalawang stand electric fans at school supplies para sa mga mag-aaral.
Sa pamamagitan ng HAPISABELA Youth Volunteers: A Day of Service 2026, naipakita ang aktibong pakikilahok ng kabataan sa serbisyo at volunteerism, habang sama-samang itinataguyod ng Pamahalaang Lungsod, paaralan, volunteers, at mga partner ang isang ligtas, inklusibo, at supportive na kapaligiran para sa mga bata. (Sulat ni E. Banding/Kuha ni M. Santos, CIO)
