Matagumpay na isinagawa ang ikalawang sesyon ng Sakayan-Kaalaman 4.0 sa Westside Elementary School, sa ilalim ng inisyatiba ni Punong Lungsod Sitti Djalia Turabin-Hataman at sa pangunguna ng Tanggapan ng Pampublikong Impormasyon, sa pamumuno ni CIO Mendry-Ann Lim, Agosto 17.
Pinangunahan ang gawain ni Mobile Library Focal Person Jham-Jham Kalbi, katuwang si LYDO Officer Levinia Jarejolne.
Nakibahagi rin sa nasabing sesyon ang Tanggapan ng Pamamahalang Pampopulasyon at Pangkaunlaran/Tanggapan ng Ugnayang Pangnutrisyon (CPMDO/CNAO) sa pangunguna ni CPMDO/CNAO Jessielyn Puno, kasama ang Westside Elementary School na pinamumunuan ni Punongguro Nurrahma Abubakar.
Sa unang bahagi ng programa, ibinahagi ng CPMDO/CNAO ang mahahalagang kaalaman tungkol sa iba’t ibang uri ng pagkain, wastong nutrisyon, at kahalagahan ng pagpili at pagkain ng mga pagkaing masustansiya. Layunin nitong mahubog ang kamalayan ng mga mag-aaral sa tamang pagpili ng pagkain at pangangalaga sa kanilang kalusugan at pangangatawan.
Sinundan ito ng isang sesyon sa pagbasa na pinangunahan ng Youth Space Mentoring Program (YSMP), kung saan nagkaroon ang mga mag-aaral ng pagkakataong malinang ang kanilang kasanayan sa pagbasa sa pamamagitan ng mga masaya, malikhaing, at makabuluhang gawaing pampagkatuto.
Patuloy na nagsisilbing daan ang Sakayan-Kaalaman 4.0 sa paghahatid ng kaalaman, pagpapaunlad ng kasanayan sa pagbasa, at pagbibigay ng makabuluhang karanasan sa pagkatuto para sa mga kabataang Isabeleño. (Sulat ni J. Kalbi, CIO/Kuha ni J. Segovia, IsaTV)
