Pinaghalo ang saya, pawis, at diwa ng pagtutulungan noong ika-3 ng Agosto sa ginanap na ‘Youth Amazing Race.’ Pinangunahan ng Pamahalaang Lungsod ng Isabela sa ilalalim ng administrasyon ni Alkalde Sitti Djalia Turabin-Hataman sa pamamagitan ng Isabela City Local Youth Development Office na pinamumunuan ni LYDO Levinia Jarejolne, ito ay isa sa mga aktibidad na bahagi ng selebrasyon ng Linggo ng Kabataan 2026.
Ang mga kalahok sa hamong ito ay ang 88 lider-kabataan na sumali sa HAPIsabela Youth Summit: The Sixth Generation’ — kung saan sila sinubok upang ipakita ang kanilang husay sa pagtutulungan, pag-iisip, at pagkilos sa ilalim ng presyon.
Bawat koponan ay kinailangang maghanap muna ng sobre na naglalaman ng mapa at panuto patungo sa unang estasyon. Sa bawat estasyon, dapat kumpleto ang lahat ng kasapi bago pa man magsimula ang hamon. Sa tuwing matatapos ang isang gawain, itataas ang bandila bilang senyales sa marshal, na magbibigay ng isang piraso ng puzzle at ng susunod na sobre. Opisyal na matatapos ang laro kapag nabuo na ang buong puzzle sa finish line. patunay na kumpleto ang bawat hakbang ng paglalakbay ng koponan.
Bukod sa saya at kompetisyon, dala ng mga estasyon ang mas malalim na mensahe: kahandaan at pagmamalasakit sa kapwa. Sa pakikipagtulungan ng City Disaster Risk Reduction and Management Office, kabilang sa mga hamon ang Buhol ng Buhay, kung saan sinubok ang husay ng mga kabataan sa mga batayang rescue knots tulad ng square knot, bowline, at clove hitch; ang Sagip-Bahay, kung saan sama-samang binuo ng koponan ang isang ‘improvised stretcher’ at dinala ang isang “biktima” sa buong obstacle course nang hindi ito ibinababa sa lupa; at ang First Aid Relay, kung saan bawat kasapi ay may itinalagang gagawin, mula sa pagsuri ng responsiveness hanggang sa CPR compressions, bago maipasa ang susunod na hakbang sa kasunod na kasapi.
Sa pamamagitan ng mga hamong ito, hindi lamang bilis o lakas ang pinatunayan ng mga koponan, kundi ang halaga ng disiplina, tiwala sa isa’t isa, at pagtutulungan, mga katangiang sentro sa bisyon ng LYDO para sa kabataang Isabeleño.
Ang Linggo ng Kabataan 2026 ay isang taunang pagdiriwang na nagbibigay-pugay sa mahalagang papel ng kabataan bilang aktibong kasosyo ng pamahalaan sa pagpapaunlad ng lungsod. (Sulat ni S. Angging, CIO/Kuha ni KJ Evardo, IsaTV)
