Nakipagpulong ang Komisyon sa Karapatang Pantao (CHR) IX kay Punong Lungsod Sitti Djalia Turabin-Hataman, Agosto 20, upang talakayin ang mga susunod na hakbang tungo sa layunin na maging Human Rights City ang Lungsod ng Isabela.
Isinagawa ang consultation meeting noong Hunyo 23, na nakatuon sa mga posibleng larangan ng pakikipagtulungan, mekanismo ng pagpapatupad, at mga estratehikong hakbang para maisulong ang Human Rights City initiative ng lungsod.
Kabilang sa mga pangunahing tinalakay ang pagtatatag ng Human Rights City at Human Rights Action Center, pagbuo ng roadmap para sa LGU tungo sa pagiging Human Rights City, at pagtukoy ng Human Rights Committee o local focal person na mangunguna sa mga kaugnay na programa at gawain.
Isinagawa ang konsultasyon kasunod ng pagtibay at paglagda sa City Resolution No. 26-7316, na nagpapahayag ng pananagutan ng lungsod na itaguyod ang dignidad, kalayaan, pagkakapantay-pantay, at inklusibong pakikilahok ng mga mamamayan.
Kabilang sa mga dumalo sa pulong sina Atty. Gladys Jacalan-Morados, Legal Division Chief Atty. Bensaud Degusman, Rasul Taup, at SP Secretary Atty. Justin Jude Briones.
Sa pamamagitan ng patuloy na pakikipag-ugnayan sa CHR, layunin ng Pamahalaang Lungsod na mapalakas ang mga mekanismo at programa para sa pangangalaga at pagtataguyod ng karapatang pantao bilang mahalagang bahagi ng people-centered at human rights-based local governance. (Sulat ni S. Sualing/Kuha ni M. Santos, CIO)
