Matagumpay na isinagawa ng Pamahalaang Lungsod ng Isabela, sa pamamagitan ng Tanggapan para sa Pagpapaunlad ng mga Lokal na Madrasah ng Lungsod (CLMDO) sa pamumuno ni Dr. Nujum Datu Indal at ng Programa para sa Kasarian at Pagpapaunlad (GAD) sa pangunguna ni Mendry Ann Lim, ang Islamic Washing o Janazah Training for Women noong ika-16 at 17 ng Agosto.
Sa tradisyong Islam, ang paghuhugas ng katawan ng yumaong babae (ghusl al-mayyit) ay dapat isagawa ng kapwa babae. Subalit sa ilang pamayanang Muslim, kabilang na ang Lungsod ng Isabela, nananatiling kakaunti ang kababaihan na may sapat na kaalaman at kumpiyansa upang gampanan ang banal na tungkuling ito. Kaya naman isinagawa ang dalawang araw na pagsasanay na ito upang mabigyan ng wastong kaalaman, tamang asal, at praktikal na kasanayan ang mga kababaihan sa paghuhugas at pagbabalot (kafan) ng katawan, hanggang sa huling dasal ng Janazah (Salat al-Janazah).
Pinangunahan ang pagsasanay ng mga kagalang-galang na ustadha — Ustaza Noraida Parang, Ustaza Tarha Hassim, Ustaza Marfauja Abdulla, at Ustaza Adawiya Asmawil — kung saan pinag-ugnay ang pagtuturo at aktwal na demonstrasyon upang masiguro na maipapasa nang tama at may respeto ang bawat hakbang ng proseso.
Dinaluhan ito ng 60 kababaihan mula sa iba’t ibang Madaris at barangay ng lungsod. Sa pagtatapos ng pagsasanay, ang mga kalahok ay hindi lamang nagkaroon ng dagdag na kaalaman, kundi naging handa ring magsilbi bilang katuwang ng komunidad sa mga panahon ng pagluluksa.
Sa pamumuno ni Alkalde Sitti Djalia Turabin-Hataman, patuloy na isinusulong ng Pamahalaang Lungsod ng Isabela ang mga programang nagpapalakas sa pananampalataya, paglilingkod, at papel ng kababaihan bilang mga tagapagdala ng tradisyon, dignidad, at malasakit. (Sulat ni R. Albani/Kuha ni K. Galano, IsaTV)
