Nagsagawa ng koordinasyon at talakayang pulong ang Pamahalaang Lungsod ng Isabela, sa pamamagitan ng Tanggapan ng Tagapangasiwa ng Lungsod na pinamumunuan ni Pedrito Eisma, ika-8 ng Agosto, upang tugunan ang mga isyu kaugnay ng pamamahala sa trapiko at pagpapatupad ng Motorized Tricycle Operator’s Permit (MTOP) system sa lungsod.
Ilan sa mga pangunahing suliranin ay ang lumalalang pagsisikip ng daloy ng trapiko, paglabag sa itinakdang ruta, iregularidad sa pagsunod sa mga patakaran ng MTOP, at kakulangan sa mahigpit na pagpapatupad ng batas. Ang mga problemang ito ay may malaking epekto sa kaligtasan ng publiko, maayos na mobilidad, at kahusayan ng serbisyo sa lungsod.
Tinalakay sa pulong ang mga layuning kinabibilangan ng: masusing pagsusuri sa kasalukuyang kondisyon ng trapiko at mga mekanismo ng pagpapatupad ng batas; pagrerepaso ng mga patakaran sa MTOP, pagsunod sa itinakdang ruta, at koordinasyon sa mga Tricycle Operators and Drivers’ Associations (TODA); pagkilala sa mga puwang o kakulangan sa operasyon at regulasyon; pagpapalakas ng ugnayan at pagtutulungan ng iba’t ibang tanggapan upang makabuo ng kongkretong solusyon; at pagmumungkahi ng mga polisiya o panukalang batas para higit pang mapatatag ang sistema ng pamamahala sa trapiko.
Dumalo sa naturang pulong ang mga kinatawan mula sa Himpilan ng Pulis (ICPS), Hepe ng BPLO Albert Porticos, CGSO Eugene Strong, Abogado ng Lungsod Atty. Rosebell Sanson, at mga kinatawan mula sa Tanggapan ng Pagpaplano at Pag-unlad.
Layunin ng hakbang na ito na tiyakin ang mas maayos, ligtas, at episyenteng daloy ng trapiko sa Lungsod ng Isabela, bilang bahagi ng pangkalahatang adbokasiya ng pamahalaang lungsod para sa isang organisado at progresibong komunidad. (Sulat ni SJ Asakil/Kuha ni M. Santos, CIO)
