Patuloy na isinusulong ng Pamahalaang Lungsod ng Isabela ang adbokasiya para sa wastong nutrisyon at kalusugan ng kabataan sa pamamagitan ng turnover ng Gardenator, bitamina, at food support para sa 40 batang kasali sa 120-Day Supplemental Feeding Program ng Barangay Carbon, ika-21 ng Nobyembre.
Nagsimula ang programa sa isang masayang trivia segment na pinamunuan ni CPMDO/CNAO Jesielyn Puno, na nagdala ng aliw at dagdag-kaalaman sa mga magulang at bata. Kasunod nito ang pagpapakilala at demonstrasyon ng Gardenator, isang home gardening kit na naglalayong hikayatin ang mga pamilya na magtanim ng sariling gulay para sa mas sustenableng pagkain sa bawat tahanan.
Nagbigay rin ng kanilang mensahe ng pagtanggap ang Lupon ng Barangay Carbon, sa pangunguna ni Kagawas Najar Suhayli, bilang pasasalamat sa tuloy-tuloy na suporta ng lungsod sa mga programang nakatuon sa nutrisyon, kalusugan, at responsableng pagkamagulang.
Matapos nito ay isinagawa ang pormal na turnover ng Gardenator sets, bitamina, at food packs—isang patunay ng matatag na partnership sa pagitan ng pamahalaan at mga pamilyang nagsusumikap na matiyak na ang bawat bata ay lumaking malusog, masigla, at maaalagaan. (Sulat ni R. Albani/Kuha ni K. Galos, IsaTV)
