Personal na sinalubong ni Punong Lungsod Sitti Djalia Turabin-Hataman ang mga kinatawan ng Development Bank of the Philippines (DBP) sa kanilang courtesy call noong Agosto 19 sa Bulwagang Panlungsod (City Hall). Layunin ng pagbisita na makipag-ugnayan sa lokal na pamahalaan at suportahan ang mga proyektong pangkaunlaran ng lungsod. Ipinahayag din ng pamunuan ng DBP ang kanilang kahandaan na magbigay ng teknikal na suporta para sa mga prayoridad na programa ng pamahalaang lungsod.
Dumalo sa pulong sina DBP Basilan Branch Manager Emily Sorilla, DBP Lending Group–Zamboanga Lending Center Head Atty. Al Brain Tenorio, at Account Officer Al-Ikram Darangina. Nakiisa rin sina Tagapangasiwa ng Lungsod Pedrito Eisma, Abogado ng Lungsod Atty. Rosebell Sanson, at Tagatasa ng Lungsod Vido Yu.
Samantala, sa ngalan ni Alkalde Turabin-Hataman, nakipagpulong si Tagapangasiwa ng Lungsod Pedrito Eisma sa mga opisyal ng Kagawaran ng Interyor at Pamahalaang Lokal (DILG) at Kagawaran ng Enerhiya (DOE) noong Agosto 19 upang talakayin ang mga programang pangkaunlaran at ugnayang pampamahalaan.
Kabilang sa mga dumalo sina DILG IX Regional Director Paisal Abutazil, DILG Central Office SLGP-PMO Program Manager Richard Villacorte, DOE Central Office Engr. Camelo Cabuga, DILG Central Office Atty. Francis Sarji Uka Aldana, LGCDD IX Chief Alvin Rex Lucero, at DILG Isabela City FOU CLGOO Arnel Alvarez. (Sulat ni SJ Asakil/Kuha ni M. Santos, CIO)
