Nakipagpulong kay Punong Lungsod Sitti Djalia Turabin-Hataman, Marso 19, ang mga miyembro ng Bangkero Association mula sa Barangay Carbon upang pormal na ipahayag ang kanilang paglahok sa micro-financing program ng lungsod. Layon ng programa na tulungan silang makabili ng bagong makina para sa kanilang mga bangka, na nagkakahalaga ng humigit-kumulang P30,000 bawat isa, na maaaring bayaran sa loob ng isang taon sa halagang P100 kada buwan.
Tinalakay din sa pagpupulong ang mahahalagang detalye para sa iminungkahing paglulunsad ng bagong subsidized transport service, partikular sa pagitan ng JW Strong Boulevard at Fuego-Fuego sa Barangay Tabiawan. Napag-usapan ang mga pamasahe, iskedyul ng biyahe, at bilang ng mga bangka upang matiyak ang maayos na operasyon. Napagkasunduan din na limang bangkero ang magpapalitan araw-araw para sa nasabing byahe. Bilang suporta, magbibigay ang lungsod ng P150 na subsidiya kada araw sa bawat bangkero sa loob ng isang buwan.
Dumalo rin sa pagpupulong sina Tagapangasiwa ng PESO Aradelria Belleng at CGSO Eugene Strong na nagpahayag ng kanilang suporta sa programa at binigyang-diin ang kahalagahan nito sa pagpapaunlad ng maritime transport at lokal na ekonomiya ng lungsod. (Sulat ni SJ Asakil/Kuha ni M. Santos, CIO)
