Patuloy ang pamamahagi ng tulong sa ilalim ng Local Government Support Fund – Financial Assistance (LGSF-FA) matapos makatanggap ang Pamahalaang Lungsod ng Isabela ng pondo mula sa Pamahalaang Nasyunal bilang bahagi ng programang “Sa Bagong Pilipinas, Bawat Bayan Makikinabang.” Isinusulong ng administrasyon ni Pangulong Ferdinand Marcos Jr., layunin nitong maihatid ang direktang ayuda sa mga mamamayan sa pamamagitan ng pagtutulungan ng pambansa at lokal na pamahalaan.
Sa pangunguna ni Punong Lungsod Sitti Djalia Turabin-Hataman, matagumpay na naipagkaloob sa Lungsod ng Isabela ang naturang pondo. Bilang bahagi ng implementasyon nito, ipinamamahagi ang tig-10 kilong bigas sa mga kwalipikadong pamilya upang makatulong sa kanilang pang-araw-araw na pangangailangan.
Sa pagpapatuloy ng distribusyon, nakatanggap ng rice assistance ang mga benepisyaryo mula sa mga barangay ng Kumalarang, Doña Ramona, at Lumbang. Magpapatuloy ang pamamahagi sa iba pang mga barangay sa mga susunod na araw upang matiyak na maaabot ang lahat ng nakatakdang tumanggap ng ayuda.
Bukod sa pamamahagi ng bigas, kabilang din sa “Sa Bagong Pilipinas, Bawat Bayan Makikinabang” ang iba pang mga programang pang-edukasyon tulad ng scholarship at iba pang serbisyong nakatuon sa mga pamilyang higit na nangangailangan.
Saklaw ng programa ang lahat ng 45 barangay sa Lungsod ng Isabela. Hinihikayat ang mga residente na patuloy na subaybayan ang mga opisyal na anunsyo ng kani-kanilang barangay para sa iskedyul ng pamamahagi.
