Opisyal ng inilunsad ang ProyekTulong: Project Subsidy Provision Program, ika-19 ng Enero sa ProyekTulong Stall na matatagpuan sa Pasangen Commercial Complex sa pamamagitan ng inisyatiba ng Tanggapan ni Board Member Ahmed Ibn Djaliv Hataman. Layunin ng programa na magbigay ng libreng school project materials sa mga estudyanteng may limitadong kakayahang pinansyal upang mabawasan ang gastusin sa pag-aaral.
Sa kanyang talumpati, binigyang-diin ni Bokal Hataman na bahagi ang ProyekTulong ng mas malawak na pagsisikap na gawing mas abot-kaya ang edukasyon sa pamamagitan ng pagbawas sa pinansyal na pasanin ng mga mag-aaral at kanilang mga pamilya. Ayon sa kanya, ito ang kauna-unahang pagkakataon na nagsagawa ang kanyang tanggapan ng ganitong kalaking programa ng tulong, na idinisenyo upang ang tanging alalahanin ng mga estudyante ay ang kanilang pag-aaral, hindi ang gastusin sa materyales ng proyekto, pagkain, o pang-araw-araw na pangangailangan.
Dagdag pa niya, ang edukasyon ay dapat magsilbing pantay-pantay na oportunidad at tungkulin ng pamahalaan na gawin ang lahat upang gawing mas magaan sa pananalapi ang pag-aaral ng mga mag-aaral. Bukas ang programa sa mga estudyante mula sa Lungsod ng Isabela at sa mas malawak na bahagi ng Basilan.
Dumalo sa aktibidad si Punong Lungsod Sitti Djalia Turabin-Hataman na nagpahayag ng optimismo at katiyakan, at sinabi na nakaaaliw at nagbibigay-kumpiyansa na makita ang isang bagong henerasyon na hindi lamang magpapatuloy kundi lalo pang pagpapahusay sa mga inisyatibang sinimulan ng mga naunang henerasyon ng mga lingkod-bayan. Binigyang-diin niya na ito ay nagbibigay ng kasiguruhan na hindi masasayang ang mga pundasyong inilatag sa kasalukuyan at ipinaalam ang posibilidad na maireplika ang programa sa lungsod,
Sa nasabing aktibidad, inilahad ni Project Head Aarison Sanchez ang mga layunin at balangkas ng pagpapatupad ng ProyekTulong, at binigyang-diin na ang tulong ay mahigpit na para lamang sa mga school-related projects at maaaring i-avail isang beses sa isang buwan ng mga kwalipikadong benepisyaryo.
Upang makakuha ng tulong, kinakailangang magpakita ang mga estudyante ng valid School ID at Certificate of Indigency. Kinakailangan ding kumuha ng opisyal na order slip na pirmado ng guro bilang patunay sa lehitimong school project, magparehistro ng kanilang detalye, at sumailalim sa beripikasyon ng mga dokumento bago mailabas ang mga materyales.
Nagbigay rin ng mga mensahe ng suporta si Konsehal Ameen Camlian, ICPC President Pastor Ronald Paulino, Basilan National High School OIC Principal Arnel Hajan, at mga kinatawan ng Kagawaran ng Edukasyon.
Ang pinakatampok na bahagi ng aktibidad ay ang opisyal na pasinaya na pinangunahan ni Board Member Hataman kasama si Alkalde Turabin-Hataman, na sumisimbolo sa kahandaan ng programa na magsilbi sa komunidad.
Dumalo rin sa aktibidad ang mga kinatawan mula sa Supreme Secondary Learner Government ng Isabela City at Lamitan City, Maluso National High School, Basilan National High School, Concepcion National High School, at Ubit National High School; ang Ministry of Basic, Higher and Technical Education ng Lamitan City at Basilan; ang Department of Education–Isabela City; ang Provincial Youth Development Office na pinamumunuan ni Sitti Shaira Dompol; at ang City Information Office na pinamumunuan ni Mendry-Ann Lim. (Sulat ni SJ Asakil/Kuha ni M. Santos, CIO)
