Nagtipon-tipon ang iba’t ibang sektor ng lipunan sa Multi-Purpose Hall ng Barangay Marang-Marang para sa 1st Semester Barangay Assembly nitong ika-22 ng Marso, sa ilalim ng temang “Nagkakaisang Barangay Tungo sa Kalinisan, Kaayusan, Kapayapaan at Kaunlaran”. Muling pinatunayan ng komunidad ang halaga ng pagkakaisa sa pag-abot ng kolektibong mithiin.
Pinangunahan ni Punong Barangay Ahmad Hamad ang programa sa pamamagitan ng kanyang taos-pusong pagbati sa mga dumalo. Naging espesyal ang okasyon sa pagdalo ng mga panauhing pandangal na sina PMSG Farsi Hamad (kinatawan ng ICPS) at ang kanyang maybahay na si Gng. Hadija Usman (School Head ng Marang-Marang Elementary School).
Nakiisa rin ang Sangguniang Kabataan sa pangunguna ni SK Chairman Khalid Janang, kasama ang IPMR, Barangay Tanods, mga Kababaihan, BHW, BNS, BION, at ang mga Solo Parents.
Sa isinagawang State of the Barangay Address (SOBA) ni PB Ahmad Hamad, detalyadong inilatag ang mga tagumpay at mga planong proyekto na tututok sa kapakanan ng bawat residente. Kabilang sa mga pangunahing agenda ay ang:
Road Clearing & Kalinisan: Patuloy na operasyon para sa maayos na kalsada at ang programang “Halinat Magtanim ng Prutas.”
Social Services: Implementasyon ng programa para sa mga Kasambahay at ang First Time Jobseekers Assistance.
Proteksyon at Seguridad: Pagpapalakas sa VAWC, BCPC, at ang kampanya ng BADAC upang mapanatiling drug-free ang barangay. Tinalakay rin ang mahalagang tungkulin ng mga Barangay Tanod sa pagpapanatili ng katahimikan.
Nagbahagi ng mahalagang paalala si PMSG Farsi Hamad ukol sa seguridad, habang binigyang-diin naman ni Gng. Hadija Usman ang krusyal na papel ng mga magulang sa paggabay sa mga kabataan. Ayon sa kanya, ang mga kabataan ng Marang-Marang ay may malaking potensyal na makipagsabayan sa anumang larangan kung may sapat na suporta mula sa tahanan.
Ang bawat Kagawad ay naglahad din ng kani-kanilang committee reports na nagpapakita ng aktibong paggawa sa likod ng mga proyekto ng barangay. Sa kabuuan, ang assembly ay nagsilbing simbolo ng mas matibay na ugnayan ng bawat sektor tungo sa mas maunlad na Barangay Marang-Marang.
(Ulat at larawan mula kay BIO Patroller Mujib Abbas ng Barangay Marang-Marang)
#BIONPatrol
#HAPIsabela
#IsangBuhayNaMaligayaAtMarangalParaSaLahat
