Binigyang-diin ni Basilan People’s Governor Mujiv Hataman ang kahalagahan ng agarang pagkilos, reporma, at pagkakaisa bilang haligi ng kanyang pamumuno sa pag-uulat ng kanyang Unang 100 Araw ng Panunungkulan noong ika-20 ng Oktubre, sa People’s Capitol, Basilan Government Center sa Lamitan City.
Sa harap ng mga lokal na opisyal, kawani ng pamahalaan, at mga lider ng komunidad, ibinahagi ni Governor Hataman ang mga unang hakbang at tagumpay ng kanyang administrasyon. “Sa unang isandaang araw ng ating paninilbihan, hindi tayo nag-atubili, hindi tayo nagpatumpik-tumpik — kumilos tayo agad tungo sa mas matatag, mas maayos, at mas maipagmamalaking Basilan,” aniya.
Itinampok ng gobernador ang mga nagawa sa ilalim ng kanyang Basilan HELPS framework — Healthcare, Education and Environment, Livelihood and Economic Development, Public Safety and Security, at Social Cohesion — na lahat ay nakaugat sa mabuting pamamahala.
Sa larangan ng kalusugan, personal na ininspeksyon ni Gobernador Mujiv Hataman ang mga ospital, nagdagdag ng mga doktor at health workers, naglunsad ng mga satellite clinic, at naghatid ng serbisyong medikal at nutrisyon sa libo-libong mamamayan sa pamamagitan ng Raayat Day at “Usap Tayo, Gob!” outreach programs. Sa ilalim ng mga inisyatibang ito, mahigit 33,000 Basileño ang nakatanggap ng direktang tulong, kabilang ang medical at wellness checkups at blood donation activities. Pinasinayaan rin ang Bohe Lebbeng Water System sa Tipo-Tipo bilang bahagi ng pagpapabuti ng access sa malinis na tubig.
Sa edukasyon at kalikasan, binuksan ang 600 metrong kongkretong kalsada sa loob ng Basilan National High School, nagkaloob ng educational assistance sa mga mag-aaral, at namahagi ng school kits sa mga bata sa liblib na barangay. Inilunsad ang “Magbassa Kite! IQRA” literacy campaign at binuo ang Provincial Madrasah Development Council upang palakasin ang parehong pormal at Islamic education. Sa kalikasan, ipinapatupad na ang “Sagip Kalikasan” program sa pamamagitan ng tree planting at coastal clean-up activities.
Para sa kabuhayan, sinimulan ang mga programang “Usaha” at “Magtanah” na tumulong sa mga magsasaka at maliliit na negosyante sa pamamagitan ng puhunan, libreng binhi, at tiyak na pamilihan para sa kanilang produkto. Sa Lamitan, itinatatag ang Provincial Nursery bilang agricultural techno-hub, habang ang pakikipagtulungan sa Autonomous Basilan Islamic Chamber of Commerce and Industry (ABICCI) ay naglatag ng MSME Sectoral Roadmap para sa mga lokal na negosyo.
Sa pampublikong kaligtasan, pinaigting ang seguridad sa mga kulungan sa ilalim ng Operation Greyhound, ipinatupad ang drug testing at rehabilitasyon, at pinalakas ang mga mekanismo laban sa pang-aabuso sa kababaihan at kabataan. Agad ding isinagawa ang mga hakbang sa panahon ng bagyong Nando at Opong upang matiyak ang kahandaan sa kalamidad.
Sa Social Cohesion, tinulungan ng pamahalaan ang mga komunidad na maresolba ang mga lokal na alitan, pinalawak ang Program Against Violent Extremism (PAVE 2.0), at nagkaloob ng tulong sa mga senior citizens, persons with disabilities, at mga pamilyang nasa krisis. Ipinagmalaki rin ng gobernador ang paglulunsad ng Basilan Women Peace Center — ang kauna-unahang Global UNAP Peace Center sa Pilipinas — at ang pagtatayo ng Yakan Weaving Center para sa pangangalaga ng kulturang Basileño.
Sa Mabuting Pamamahala, ipinatupad ni Governor Hataman ang Executive Order sa Freedom of Information (FOI) para sa transparency, ipinagbawal ang online gambling sa mga kawani, itinaas ang sahod ng mga empleyado, at muling binuhay ang mga local special bodies upang tiyakin ang partisipasyon ng mamamayan. Inilunsad din ang “Mujiv LIVE” upang magbigay-daan sa direktang pakikipag-ugnayan sa publiko.
Sa pagtatapos ng kanyang ulat, binigyang-diin ni Governor Hataman na ang mga nagawa sa unang isandaang araw ay simula pa lamang ng pagbabago sa Basilan. “Simula pa lang ito,” aniya. “Kung ito ang kaya nating marating sa loob ng isandaang araw, isipin natin kung gaano pa kalayo ang mararating ng Basilan kung patuloy tayong magtutulungan.”
Ang ulat ay nagsilbing patunay sa pangako ng pamahalaang panlalawigan sa isang pamahalaang bukas, tapat, at nakikinig — isang Basilan na patuloy na umaangat sa landas ng kapayapaan, pag-unlad, at pagkakaisa. (Sulat ni SJ Asakil, CIO/Kuha nina KJ Evardo, IsaTV at M. Santos, CIO)
