Pormal nang ipinagkaloob sa pamunuan at mga residente ng Barangay Tabuk ang bagong gawang Barangay Hall na isinakatuparan sa ilalim ng inisyatiba ni Punong Lungsod Sitti Djalia Turabin-Hataman, ika-25 ng Hunyo.
Ang proyektong nagkakahalaga ng P3,936,564.58 ay pinondohan sa ilalim ng 20% Development Fund ng Pamahalaang Lungsod ng Isabela. Layunin nitong bigyan ng mas maayos at mas ligtas na lugar para sa operasyon ng pamahalaang barangay at mga serbisyong inilalaan sa mga residente.
Sa kanyang mensahe, binigyang-diin ni Alkalde Turabin-Hataman na ang Barangay Hall ay hindi lamang gusali kundi isang simbolo ng mas pinaigting na serbisyo publiko at pakikipag-ugnayan ng pamahalaan sa mamamayan.
Nagpahayag naman ng pasasalamat ang mga opisyal ng Barangay Tabuk sa pangunguna ni Punong Barangay Hja. Eyam Ajibon sa lokal na pamahalaan, na nagsabing malaking tulong ang bagong pasilidad upang higit na maging episyente at maayos ang paghahatid ng serbisyo sa kanilang komunidad. (Kuha ni M. Santos, CIO)
