Pormal na pinasinayaan ng Pamahalaang Lungsod ng Isabela, sa pamumuno ni Alkalde Sitti Djalia Turabin-Hataman, ang bagong tayong Barangay Health Station sa isla ng Lampinigan noong ika-28 ng Mayo.
Pinondohan sa pamamagitan ng Gender and Development (GAD) Fund ng lungsod, ang proyekto na nagkakahalaga ng P2,498,527.23 ay naglalayong palakasin ang pagbibigay ng pangunahing serbisyong pangkalusugan sa nasabing lugar. Ipinapakita ng inisyatibong ito ang matibay na paninindigan ng kasalukuyang administrasyon sa pagbibigay ng abot-kaya, inklusibo, at dekalidad na serbisyong pangkalusugan, lalo na sa mga kapuluan ng lungsod.
Dumalo sa aktibidad ang mga opisyal mula sa Barangay ng Lampinigan na pinangungunahan ni Punong Barangay Aksan Hamad, kasama ang mga kinatawan mula sa Tanggapan ng Kalusugan, Tanggapan ng Inhinyeriya, mga Barangay Health Workers, at mga komadrona.
Inaasahang makatutulong ang bagong pasilidad sa pagbibigay ng mahahalagang serbisyo tulad ng pangangalaga sa ina, pagbabakuna, edukasyong pangkalusugan, at iba pang batayang interbensyong medikal—na tiyak na magpapabuti sa pangkalahatang kalusugan ng mga residente ng Lampinigan. (Sulat ni SJ Asakil/Kuha ni M. Santos, CIO)
